قازانج. (1) لە ژمێریاریدا بریتییە لە سەرجەم دەسهاتی فرۆش كە تێچوونی لێ كەم دەكرێتەوە (سەیری ڕاپۆرتی داهات بكەن). (2) لە تیۆریی ئابووریدا، بریتییە لە جیاوازیی نێوان دەسهاتی فرۆش و تێچوونی تەواوی دەرفەتی سەرچاوەكان (full opportunity cost of resources) كە لە بەرهەمهێنانی شمەكدا بەشدارن.

ڕاپۆرت یان حیسابی سوود و زیان (سوود و زەرەر). سەیری ڕاپۆرتی داهات بكەن.

قازانجی سفری ئابووری. لە پیشەیەكدا کە لە دۆخی هاوسەنگیی درێژخایەندا ڕكەبەرایەتیی تەواو هەیە، قازانجی ئابووری سفرە. ئەم پێناسەیە ئاماژەیە بە سەرجەم دەسهات كە سەرجەم تێچوونی لێ كەم دەكرێتەوە و، تێچوونە نادیاری (implicit costs) سەرچاوەكانیش کە هیی خاوەن یەكەیە (كۆمپانیایە)، دەگرێتەوە.

خاڵی قازانجی سفر. بۆ یەكەیەكی ئابووری، ئەو ئاستەی نرخە كە حیسابەكانی یەكە هاوتا دەكات (یان سوود و زیانەكەی یەكسان دەكات)، واتە گشت تێچوونەكانی پڕ دەكاتەوە، بەڵام قازانجەكەی سفرە.