(ئم.) ١- بۆ دەربڕینی هەستی خۆشەویستی و لاواندنەوەی منداڵی بچووک. ئەی لۆ ڕۆڵە گیان چەند ژیرکەڵەیە! ٢- بۆ گاڵتە پێکردن و بەڕاست زانینی قسەیە. ئەی لۆ! تۆخوا بزانە گەزەگەزەی دەزانێ. *ئەیەلۆ.

(ئم.) بۆ دەربڕینی بێ باوەڕی و ناڕازێتی. ئەیهوو ((کەر لە لوێ کەوتووە و کوندە لە کوێ دڕاوە)). تێبــ.- دووپاتە کردنەوەی نیشانەی بێ باوەڕی و ناڕازێتی تێکەڵ بە تووڕەییە. ئەیهوو، ئەیهوو!، من چی پێدەڵێم و ئەو چم جواب دەداتەوە.

تم؛ ئەهۆ. ئەی هۆ چی بەسەر چێوەیە. تێبــ.- دووپاتە کردنەوەی بێزاری زۆرتر پیشان دەدا.

(ئم.) ١- بۆ بانگ هێشتن و لە پێش ئەو ناوەدا دێت کە بانگی لێدەکەن. ((ئەی بولبولی بێدانە من و ئێوە هەژارین)) ((هەر دوو وەکوو یەک مونتەزیری فەسڵی بەهارین)) (قانیع: گوڵاڵە-٥٨) ((...دەڵێن ئەی ڕەب: کەنگێ ئەتۆمان برسی دی، یان تینوو یان دە بەندیخاناندا و خزمەتمان بە تۆ نەکرد؟)) (ئینجیل: مەتی-٧٥) ٢- بۆ بانگ کردنی تێکەڵ بە مەترسی، خەفەت و سەرسسوڕمان. ئەی ماڵی وێرانم، ئەی بابەڕۆ، ئەی لەو درۆیە. * ئای، هەی.

(ئم.)، (سیم.) تم: ئەدی. تێبــ. - ئەم وشەیە هەر (ئەدی) یەکە و لەبن لەهجەی سلەیمانیدا (د)ەکەی کلۆربووە و بۆتە (ئەیی) و ئەوجار بە جارێک سواوە و کەوتووە. ((... ئەی چۆن، کەس هەیە ئەوە نەزانێت کە تۆ سەرکردەیی...)) (بلە:ژان-١٢٢)، ((...دیوەخان چۆڵ و هۆڵ و ڕووت و قووت، وشترخانە، ئەی چییە؟)) (قزڵجی: پێکەنین-٣٨).